Di 80er und di 90er Joa

Gaundse fiadsen Joa laung hod di Rapid woatn miassn, easchd daun sans wida Masda wuan. Und ned nua des - se woan im Finale fom Europacup da Cupsieger!

Am Aunfaung fo di 90er Joa is nocha ned so guad grend, owa ollawäu - a boa Joa drauf homs in Cup gwunna, san Masda wuan und woan wida im Finale fom Europacup da Cupsieger.

Mia san wida Masda!

Des woa aso: Wia di Saison 81/82 aungfaungan hod, hom olle gmand: Di Rapidla, di wean s scho dabockn. Wias 81er Joa um woa, woans Heabstmasda, und di Leidln hom gsokd: I hobs e gwusd!

Im 82er Joa is daun ned so guad grend, owa se hom si dafaungan. Bein ledsdn Match san 25.000 im St. Hanappi gwesn, di Bude woa bumfoi. Olle homsas segn woin, wia di Rapid in easchdn Masda-Ditl seid fiadsen Joa hoid.

Di Unsrichn hom fon Aunfaung aun aufbassd ois wia di Haftlmocha, dass jo kaner an Föla mocht - und se hom di Innsbrucker med an Fimfadragal hamgschickt! Fimf-nui! Und di Leid hom duachs Bodschnkino in Krankl Hanse, dea wos gschbead woa, sogn ghead: "Olle homs uns in Masda-Ditl schdön woin! Di Funktionäre! Di Schiris! Owa jetsan is a in Hittlduaf … Olle! Owa jetsan is a in Hittlduaf!" Di Mödung fo unsan Hansebuali wiad no heid dadsöd.

Des Gschbü geng Celtic Glasgow – a Waunsinn!

1984/85 hod di Rapid im Europacup da Cupsieger dseaschd di Besiktas Istanbul aussighaud, waunst di dswa Batin dsomdsösd med fimf-dswa! Im Ochtlfinale homs di Celtic Glasgow im St. Hanappi med drei-ans gschlogn - owa in Schottland med nui-drei oobissn!

Schdöds eich fua, wos si durtn oogschbüd hod! Da Schwoatse hod wüd umanonda bfiffm und di schottischn Fans hom an Bam aufgschdöd wia ned gscheid. In Weinhofer Rudi homs wos nocheghaud, ea woa marod und hod aussi miassn. Di Rapid hod nimma dauschn kena und an Brodest eiglegd, dea wos duachgaunga is.

Driumpf in da Old-Trafford-Hittn

Des Match is widahoid wuan, mia hom auf an näudraln Bodn gschbüd, wia ma so sogt - am dswöftn Dezember 84 in da Old-Trafford-Hittn fo Manchester United. Di Gika fo da Celtic Glasgow hom med grien-weissn Leiwaln gschbüd, di Rapid med rode Leiwaln. Da Pacult Peter hod des Goi dsan ans-nui gmocht - mia woan im Fiatlfinale!

Daun a Waunsinnsbuschkawü, unsa Goimau Herbert "Funki" Feurer is in seina Kistn fo an Dsuaschauer biand wuan, in Pacult Peter homs beim Aussegeh dredn, schdö da des fua!

A brada Wech ins Finale

Des neksde Match woa e aa ka Leachalschas ned. Im Fiatlfinale homs ausweats geng di Dynamo Dresden med nui-drei oobissn, owa in Hittlduaf is des Gschbü grend wia r am Schniarl. Noch 37 Minuten homs olles aufghoid ghobd und am End med fimf-nui gwunna!

Daun homs im Hoibfinale di Dynamo Moskau aussigschdampat.

Im Finale sans gengan neichn englischn Masda Everton aundredn und hom med ans-drei faluan. Da Krankl Hanse hod des Goi fia di Rapid gschossn - des woa des easchde Final-Goi fon aner ösdareichischn Gika-Bati. Owa ollawäu, im söm Joa hom se si geng di Austria in drittn Cup-Sieg hintaranond ghoid - im Finale, in an Öfa-Schiassn!

Ollas neich

Daun hods schbuatlich und wiadschoftlich grammld, di Rapid woa in da Scheisgossn. Owa se hom s dahobm, hom si wida guad aufgschdöd. Des neiche Präsidium midn Oertel Karl-Heinz ois Scheefe und midn Kuhn Werner ois Mochatschek hod fia di Saison 1994/95 neiche Schbonsoan aufdribm. Da Drener, da Dokupil Ernstl, hod med an Hauffm Frischgfaungta a Team dsombasdld - med Ballestaran wia in Schöttel Peter, in Konsel Michl, in Pecl Robert und in Kühbauer Didi.

Di Rapid bringsd ned um – da 14. Cupsieg

So schnö hosd goa ned schaun kena, und di woan a dsomgschwassde Bati, Schbuatlich sans auffigflogn, in da Liga homs umman Masda-Ditl midgrangld und san Dritta wuan. Im Cup homs dseaschd in faforisiatn Eadsriwaln Salzburg ausseghaud. Daun homs im Cup-Finale med ans-nui geng DSV Leoben (Goi: da Guggi Peter) gwunna und hom dsan fiadsentn Moi - und bis heid dsan ledsdn Moi - s Hefal in d He gschdemd.

Schdearnschdundn im Europacup

Im Europacup homs dseaschd amoi Petrolul Ploiesti daham med drei-ans gschlogn.

Daun hom se si a nui-dswa-Dreschn draussd bei da Sporting Lissabon ghoid und olle hom gmand, jetsa is di Gschichd midn Europacup fuabei.

Im Rückschbü hod da Kühbauer Didi des ans-nui gschossn. Kuats fuam Oobfiff hod da Stumpf dsan dswa-nui eignetsd. In da Falengarung hods no dswa Moi in da Kistn fon da Sporting Lissabon gscheppad. Di Rapid hod dsaus fia-nui gwunna und is med fia-dswa aufgschdign.

Di Dynamo Moskau homs med ans-nui ausweats und drei-nui daham wekabutsd. Da Jancker Carsten hod wegnan Cut an Duaban griagd - und dswa Goi gschossn. Seid deara Dseid hassn s eam Duaban-Bomba.

A Schdearnschdund woa aa des Hoibfinale geng di Feyenoord Rotterdam: ans-ans ausweats und drei-nui daham.

Dswa Joa fuahea sans no midn Ruckn dsua Wond gschondn, jetsa woans dsan dsweitn Moi im Europacup-Finale!

Owa di Rapid-Fans in Brüssel, a gaundsa Oaschfoi is midkuma, hom niks aundas duan kena ois wia di Unsrichn dresdn - geng Paris SG homs med nui-ans faluan - wegnan oogföschdn Freischdos, schdö da des fua!

Da Masda-Ditl im Joa 1996

Owa wasd e, des Joa woa ans fo di eafoigreichstn in da jingaren Club-Hisdoarie. Waunst auf dswa Kiadog dauntsd - Europacup und Masdaschoft - muasd ruachln wia r a Waglhund. Owa drots dass di Rapidla ruachln hom miassn, woans in da Masdaschoft di Ansa-Bati. Nua Sturm Graz hod midghoidn. Am 1. Juni 1996 woa daun des Match um di Solodschissl. 48.000 san ins Happel-Schdadion kuma, es woa wida bumfoi, und se hom schene Diarln duachn Pivarnik und duachn Stumpf gsegn. Es woa a fadinta dswa-nui-Sieg und da easchte Ditl noch ocht Joan.

Dsan easchdn Moi in da Gruppenphase fo da Champions League

In da Kwalifikatsion dsua Champions League hod di Rapid daham geng di Dynamo Kiew dswa-nui gwunna, in da Ukraine goa fia-nui. Oisdan - di Rapid woa in da Gruppenphase fon da Champions League!

Manchester United, Juventus Turin und Fenerbahce Istanbul san um a Numma dsgros gwesn, owa des easchde Aufdredn fo da Rapid in da Königsklasse wiad ka Mensch so schnö fagessn.


Mehr als 3000 Wörter und Wendungen des Wienerischen finden Sie in diesem Buch!

Mit Textbeispielen aus Wienerliedern, Austropop-Schlagern, beliebten Kabarettprogrammen und vielem mehr. Als Draufgabe gibt es Informationen über die Wortherkunft nach neuestem Stand der Wissenschaft. Ein unentbehrliches Nachschlagewerk, das Wissen vermittelt und zugleich köstlich amüsiert.

Robert Sedlaczek
Wörterbuch des Wienerischen
In Zusammenarbeit mit Melita Sedlaczek
318 Seiten, € 12,95
ISBN 978-3-85218-891-1
Haymon Verlag

Link zum Buch

Pfitschigogerl

Extrawürstel

Unsare Wuadsln

Di Goidanen Joa

Di Bfoawisn

Gerhard-Hanappi-Schdadion

Di Iwadriwa-Match

Legendenklub

Di Rapid-Fiadlschdund