Di Goidanen Joa

Di Rapidla woan scho in da Dswischngriagsdseid ka Bemmal ned, nadsional und intanadsional homs uanlich oogramt. Owa aus heitiga Sicht götn di Joa da Nochgriagsdseid bis dsan Aufaung fon di 60er Joa ois di Goidanen Joa. Deamoen is unsa Farein a wöd Bati gwesn und füle Rapid-Kapatsunda schdomman aus dera Dseid. Waunst weidalesn duasd, daun findsd a Gsattsl iwa di hassasdn Batin. (Bassds auf: Di berimptn 80er und 90er Joa schdengan auf ana eksdra Seitn).

Auf da Woids in Südamerika

Di Rapidla san in da Wöd umanondschdrawandsd. Des 50-Joa-Jubiläum 1949 woa gaunds im Dseichn fon Auslaunds-Reisn. Noch da Malta-Foat dsum Joaresweksl und ana Ägypten-Dua im Februar sans noch Südamerika ausgridn, durtn sans a Monat blibm. Aus di Metschaln gegn wöd Fareine wia Vasco da Gama, Flamengo Rio oda in FC Sao Paulo hod si di Rapid des brasilianische System oogschbeandsld und midgnumma - des woa in da Oat fon ana Fiara-Kedn, wia ma heid sogn ded. In da easchdn Saison fo da Staatsliga 1949/50 hom di Grien-Weissn owa ned mea ois in Fidse-Masdaditl dabockt.

A Hauffm dulli Matches in Grien-Weiss

In da Saison 1950/51 hods im Dawi geng di Austria im Weana Schdadion med siwane-fimf (drei-fia) ans fo di leiwaundstn Matches in da Masdaschoft iwahaupt gebm. 55.000 hom dsuagschaud wia di Rapid des Schbü drad hod. A Wochn drauf is Sturm Graz fua 13.000 Leid auf da Bfoawisn med dswöf-ans nidabeglt wuan, und di Vienna hod med nui-nein oobissn. Med an Fia-Bunkte-Fuaschbrung auf Wacker Wien is di Rapid ois ungschlogana Heabsdmasda in di Wintabausn gaunga.

Rekoade iwa Rekoade – und des Debü fom Hanappi Gerhard

Im Fruajoa hod da Hanappi Gerhard, dea wos deamoen 21 Joa oid woa, am End fo an ewichn Transferwickl mid da Wacker dsan easchdn Moi fia di Grien-Weissn schbün deaffm. Owa des Debü-Schbü kaunst fagessn. Rapid hod mid ans-dswa bein LASK faluan - des woa di easchde Dreschn in dera Saison – und di andsiche. Owa di Rapid hod in Fods ned henga lossn und is iwalegn dsan 17. Moi Masda wuan - 133 Goi in 24 Matches homs gschossn, des is bis dsan heitign Dog Ligarekord.

Zentropacup-Sieger

Di Masdaschoft woa grod fuabei, do hom in Wean fia Maunschoftn am Zentropacup däugnumma. Deamoen homs brobiat, dass da Mitropacup, dea wos in da Dswischngriagsdseid a Riesn-Drara gwesn is, wida lewentich wiad. Mid an fimf-nui geng di Lazio Rom hod da SK Rapid fua 23.000 Leid im Broda-Schdadion des Finale eareichd und durtn di Wacker Wien med drei-dswa (ans-ans) gschlogn. Da Happel Ernstl hod in da 90. Minutn a Dial gschossn, des wos in Endschdond fom Schbü brocht hod - eam hom s ois Fadeidiga aufgschdöd ghobt.

Mid ana Siegesserie dsan neksdn Ditl

Daun sans dsu di Diakn und dsu di Grichn ausgridn und di Rapid is weida auf da Siegaschdrossn gwesn. Dsen gwunnane Matches hintaranond, darunta a drei-ans gengan Schbidsnreida Austria, hom di Rapid wida dsan Easchdn in da Dabön gmocht. Med an siebm-ans geng Sturm Graz und an fia-nui in Kapfenberg hom se si in 18. Masdaditl eignad.

Driumpf gengan englischn Masda Arsenal

Im Joa drauf hods fia di eafoigsfawentn Grien-Weissn nua dsu Blots drei greicht, owa intanadsional homs aufgeigt. Am 24. Mai 1953 homs in Brügge med an seks-ans (dswa-nui) in neichn englischn Masda Arsenal wekabutsd. Drena fom SK Rapid woa da Uridil Josef, ea hod im Fruajoa in Pesser Hans noch aner ned so leiwaundn Südamerika-Dua ooglesd. Da Peppi Uridil hod seine Gika med ana leiwaundn Mödung aufs Schbü eigschdöd ghobt: "Di san öfe, mia san öfe. Oisdan: Schbüds, wos kennts! Und wauns gwinnts, nocha gibds a Sektal." Drei Dog fria hom di Hittlduafa fua 65.000 Leid in Amsterdam den FC Middlesbrough fo da englischn easchdn Liga mid dswa-ans gschlogn ghobt.

In da Schweiz WM-Dritta

Da hekste Schbinod im Joa 1954 woa di Fuasboi-Wödmasdaschoft in da Schweiz. Im Nadsionalteam woa kwasi di gaundse Rapid-Maunschoft fadredn: da Zeman Walter, da Happel Ernstl, da Hanappi Gerhard, da Gießer Karl, da Halla Paul, da Riegler Hans, da Dienst Robert, da Probst Erich - und di Körner Briada, da Robert und da Fredi. Dseaschd homs geng di Schottn gwunna, daun geng di Dschechoslowakn und geng di Schweiz. Easchd im Hoibfinale is des ÖFB-Team geng Deitschlond med ans-seks untagaunga. Im Gschbü um Blots drei homma mid drei-ans geng Ditlfadeidiga Uruguay gwunna.

Da Happel schiasst drei Goi gegn Real

Midn neichn Trainer, midn Merkel Max, is di Rapid in di Saison 1956/57 gaunga. Im Heabst san s im Europcup midn Ditlfadeidiga Real Madrid dsomkrocht – a Waunsinnsgschicht. Dsan easchdn Schbü im Bernabeu-Schdadion san 125.000 Leid kumma und di Schbania hom med fia-dswa gwunna. Im Rückschbü im Broda Schdadion hom 53.000 middsidad. Di Rapid hod scho mid drei Goi fom Happel Ernstl gfiad, owa daun hod da Alfredo di Stefano des ans-drei gschossn. Jetsan woa ollas dsamdsöd da Score fümf-fümf und es hod a drittes Schbü in Madrid gebm. Duatn hot di Real mid dswa-ans gwunna und da SK Rapid is aussegflogn. Am End san di Schbania wida Europacup-Sieger wuan.

Da 25. Masda-Ditl

Im Europacup-Ochtlfinale 1967/68 hod di Rapid noch an ans-nui dsaus gengan deidschn Masda Eintracht Braunschweig draussd nui-dswa faluan. Owa in da Masdaschoft woa Grien-Weiss obmauf, se hom si in 25. Ditl ghoid. Des Cupfinale gengan GAK homs med dswa-nui gwunna.

Waun domois ana brofedseid hed, da SK Rapid muass 14 Joa laung aufn neksdn Masdaditl woatn – a so a Brofed warad glei drauf im Guglhupf gsessn.

Driumpf im Europacup iwa Real

Ana da gresdn Momente fia di Rapid auf da intanadsionaln Ewane is nocha im Heabst 1968 kuma. Im Europacup-Ochtlfinale hod da SK Rapid gengan seksfochn Europacupsieger Real Madrid duach a Goi fom Kaltenbrunner Günter ans-nui gwunna. Im Rückschbü im Bernabeu-Schdadion is di Rapid fua 80.000 Leid dsua Hoibdseid med nui-ans hintn glegn, owa in da 50. Minute hod da Bjerregaard in Ausgleichsdreffa gschossn. Di Schbania hom kuats fuan Schlussbfiff auf dswa-ans gschdöd, owa di Rapid woa duach des Ausweadsgoi im Fiatlfinale. Duatn hom se si am Ditlfadeidiga Manchester United di Dsent ausbissn - mid nui-drei und nui-nui. Owa ollawäu - es woa a wöd Europacup-Saison, ane da gresdn in unsara Hisdoarie.


Mehr als 3000 Wörter und Wendungen des Wienerischen finden Sie in diesem Buch!

Mit Textbeispielen aus Wienerliedern, Austropop-Schlagern, beliebten Kabarettprogrammen und vielem mehr. Als Draufgabe gibt es Informationen über die Wortherkunft nach neuestem Stand der Wissenschaft. Ein unentbehrliches Nachschlagewerk, das Wissen vermittelt und zugleich köstlich amüsiert.

Robert Sedlaczek
Wörterbuch des Wienerischen
In Zusammenarbeit mit Melita Sedlaczek
318 Seiten, € 12,95
ISBN 978-3-85218-891-1
Haymon Verlag

Link zum Buch

Pfitschigogerl

Extrawürstel

Unsare Wuadsln

Di Bfoawisn

Gerhard-Hanappi-Schdadion

Di 80er und di 90er Joa

Di Iwadriwa-Match

Legendenklub

Di Rapid-Fiadlschdund