Di Iwadriwa-Match

Da SK Rapid kaun auf an Hauffm Iwadriwa-Matches dsruckschaun. Waunst weida owi skroulst, daun findst soichane Batin und di Schbüdatn dadsua aa. Aussadem kaunst da Highlightvideos fo di grien-weissn Schdeanschdundn aunschaun. A leiwaunde Gschichd.

Da Mitropacupsieg 1930

Da Mitropacup woa fuam Dsweitn Wödgriag da ollawichdigste Klubbeweab, und olle sogn, da Mitropacup is da Fualeiffa fo da Champions League gwesn. Da SK Rapid hod im Joa 1930 ois easchda in Mitropacup gwunna und is aufn Gipfe fom europäischn Fuasboi gschdaundn. Olle hom gmand, di Rapid hod geng di Sparta Prag ka Dschants, owa se hom draussd med dswa-nui gwunna. Daun homs in Wean med dswa-drei faluan, owa des woa scho wuaschd - da SK Rapid is Mitropacupsieger gwesn. Aufm Wech ins Finale hom di Hittlduafa geng di Wödklasse-Klubs CFC Genua (med seks-ans) und Ferencváros Budapest (med fimf-ans) gwunna ghobd.

 
2.November 1930 | Letna Stadion (Prag) | 25.000 Zuschauer
Sparta Prag: Belik; Burgr, Hojer; Madelon, Kada, Srbek; Patek, Kostalek, Braine, Silny, Hejma
SK RAPID: Bugala; Schramseis, Czejka; Rappan, J. Smistik, Vana; Kirbes, Weselik, Kaburek, Luef, Wesely
Tore: 0:1 (9.) Luef, 0:2 (57.) Weselik

 


Da Tschammer-Pokal 1939

In da Nadsi-Dseid hom unsare Fareine in da deitschn Masdaschoft und im deitschn Cup midgschbüd. Es woa a schware Dseid fia Europa, da Fuisboi is a Nebmsoch gwesn. Owa gikt wuan is ollawäu, sogoa no kuats befua di Hackinga kapituliad hom.

Im Joa 1939 hod di Rapid in Tschammer-Pokal gwunna. Wissts e, da Tschammer Pokal is da Fualeiffa fom DFB-Pokal gwesn. Di Rapid hod im Finale in FSV Frankfurt med drei-ans gschlogn, und wia so ofd is di Rapid-Fiadlschdund fia Grien-Weiss da Aunschboan gwesn. Di Frankfurter hom bis dsua 80. Minutn med ans-nui gfiad. Daun hod di Rapid med drei Goi des Schbü drad: Da Schors Georg, da Hofstätter Johann und da "Bimbo" Binder hom eignetsd. Sauwa gschbüd, a wöd Bati!

 
8.Jänner 1939 | Olympiastadion Berlin | 40.000 Zuschauer
SK RAPID: Raftl; Sperner, Schlauf; Wagner, Hofstätter, Skoumal; Hofer, Schors, Binder, Holec, Pesser
FSV Frankfurt: Wolf; May, Schweinhardt; Böttgen, Dietsch, Fendt; Armbruster, Heldmann, Dosedzal, Faust, Wörner
Tore: 0:1 (17.) Dosedzal, 1:1 (80.) Schors, 2:1 (85.) Hofstätter, 3:1 (88.) Binder

 


Da Bimbo Binder hoid di Victoria noch Hittelduaf

Ned gaunds dswa Joa drauf hod si da Sk Rapid di Victoria aa no ghoid, des woa di deitsche Masdaschoft. Gib da des, 100.000 Leid san ins Berliner Olympia-Schdadion bofld! Dseaschd hod da FC Schalke 04 di Hittlduafa schwindlich gschbüd: Di Deitschn hom noch ana Schdund med drei-nui gfiad. Owa da SK Rapid hod in dsen Minutn s Schbü drad: Da Schors Georg hod in Aunschlussdreffa gmocht und da Binder Franz hod dswa Moi an Freischdos und a Moi an Öfa eibaud. Duach des is des Match und di deitsche Masdaschoft noch Hittlduaf gaunga.

 
22.Juni 1941 | Olympiastadion Berlin | 95.000 Zuschauer
SK RAPID: Raftl; S. Wagner, Sperner; F. Wagner, Gernhardt, Skoumal; Fitz, Schors, Binder, Dvoracek, Pesser
Schalke 04: Klodt; Bornemann, Schweißfurth; Füller, Tibulski, Gellesch; Burdenski, Szepan, Eppenhoff, Kuzorra, Hinz
Tore: 1:0 (5.) Hinz, 2:0 (8.) Eppenhoff, 3:0 (58.) Hinz, 3:1 (62.) Schors, 3:2 (63., Freistoß) Binder, 3:3 (65., Elfmeter) Binder, 3:4 (71., Freistoß) Binder

 


Di wöd Saison 1950/51: 133 Goi in 24 Match

A Schnid fo 5,54 Goi pro Schbü - des is a Rekoad fia di Ewichkeid, do foad di Eisnbohn driwa. In da grandiosn Saison 1950/51 hod di Rapid in 17. Masdaditl gfeiad und di Kanoniere, wia mas fria ghassn hod, hom aus olle Rearln gschossn. Glei in da r easchdn Runde hom s in LASK med öf-dswa uanli döglt.

Aa in di neksdn Gschbü hods kan Bardon ned gebm: dswöf-ans geng Sturm Graz, ocht-nui geng den FC Wien - und im Broda-Schdadion nein-nui geng di Vienna und öf-nui geng di Elektra. Owa ned nua des: Grien-Weiss hod si aa in Zentropacup ghoid, dea wos owa ned so wichtich gwesn is ois wia da Mitropacup. Da SK Rapid hod dseaschd di Lazio Rom med fimf-nui aussigschdampat und daun im Finale med drei-dswa Wacker Wien gschlogn. A Sinnbüd fia di Saison woa des Schbü geng di Austria, des Match med di meisdn Goi in an Weana Dawi. Im bumfoen Broda-Schdadion hod di Rapid in an hassn Match di Austria med siwane-fimf nidakempft.

 
17.September 1950 | Praterstadion | 55.000 Zuschauer
Austria Wien: Schweda; Melchior II, Kowanz; Joksch, Ocwirk, Böhme; Melchior I, Richter, Huber, Stojaspal, Aurednik
SK RAPID: Zeman; Merkel, Happel; Müller, Gernhardt, Golobic; R. Körner, Riegler, Dienst, Probst, A. Körner
Tore: 0:1 (10.) Gernhardt, 0:2 (12.) Gernhardt, 1:2 (13.) Huber, 1:3 (20.) A. Körner, 2:3 (23.) Huber, 3:3 (39.) Melchior I, 4:3 (44.) Richter, 4:4 (47.) Dienst, 5:4 (55.) Melchior I, 5:5 (60.) R. Körner, 5:6 (64.) Dienst, 5:7 (75.) R. Körner

 


Dem Happel sei Hattrick geng di Keniglichn

Mia schreibm des Joa 1956. Domoes woa di easchde Bati im Europapokal da Laundesmasda scho glei s Ochdlfinale. E scho wissen, des woa da Fualeiffa fo da heitign Champions League. Im easchdn Europacupduö hod ka geringara ois di Real Madrid auf d Hittlduafa gwoat. Domoes hods no kana gwusd: Di Real wiad ian Ditl aus da furign Saison no fia Moi fadeidign! Owa geng di Rapid hedn s beino an Schdoipara gmocht. Dseaschd a dswa-fia in Madrid, daun hod fian Happel Ernst dsaus di Schdeanschdund gschlogn. Ea woa aufgschdöd ois a Libero und hod olle drei Goi bein drei-ans geng di Keniglichn gschossn. Wias domoes den Regln noch so woa, is a dritts Gschbü aungsetsd wuan und da SK Rapid hod sei Hamrecht an di Madrilenen fascheawld. Des dritte Duö im Bernabeu-Schdadion hom s med nui-dswa faluan. Real Madrid hod daun no Nizza, Manchester United und in AC Fiorentina gschlogn - es woa im Masdapokal da dsweite fo fimf Ditln hintaranond.

 
1.November 1956 | Praterstadion | 53.000 Zuschauer
SK RAPID: Zeman; Halla, Happel, Golobic; Hanappi, Gießer; R. Körner, Riegler, Dienst, A. Körner, Höltl
Real Madrid: Alonso, Atienza, Oliva, Lesmes; Munoz, Zarraga; Joseito, Marsal, di Stefano, Kopa, Gento
Tore: 1:0 (19., Freistoß) Happel, 2:0 (38., Elfmeter) Happel, 3:0 (41., Freistoß) Happel, 3:1 (57.) Di Stefano

 


Kaltenbrunner und Bjerregaard mochn di Real Madrid damisch

In da Saison 1968/69 is ned so grend wia ma si s fuagschdöd hod. Ollawäu, se hom dsan simbtn Moi in Cup gschdemd. Owa di Masdaschoft woa a ewichs Auffe und Owe und am End homs nua in drittn Blods gmocht. Se hom 28 Batin gschbüd und ochte faluan. Im Ochdlfinale fom Europäischn Masdapokal homs daun olle iwaroschd und di draurige Saison fagessn gmocht. Aussadem hom se si fia 1956 rewaunschiad. Dsum Hischbü geng di Real Madrid san 45.000 ins Broda-Schdadion bügad und di san noch 55 Minutn in d He gfoan, wia da Kaltenbrunner Günter, schbeda da Präsident fo da Rapid, des goidane Dial gschossn hod.

Dswa Wochn drauf im Rückschbü im Bernabeu hod se di Rapid aa ned in Neaf dsiagn lossn. Duach a Ausweatsgoi fom Bjerregaard Johnny, unsan Goigetta aus Dänemark dea domoes 25 Joa oid woa, is da SK Rapid duach di Ausweatsgoiregl ins Fiatlfinale aufgschdign. Durt woa leida geng di Kapatsunda fo Manchester United mid Gikan wia Charlton, Best, Law und Stiles di Endschdadsiaun.

 
20.November 1968 | Praterstadion | 45.000 Zuschauer
SK RAPID: Fuchsbichler; Gebhardt, Glechner, Fak; Skocik, Ullmann; Fritsch, Bjerregaard, Grausam, Flögel, Söndergaard (46. Kaltenbrunner)
Real Madrid: Betancort; Calpe (46. Babiloni), de Felipe, Zunzunegui, Sanchis; Pirri, Velazquez, Bueno; Jose Luis, Grosso, Perez
Tor: 1:0 (55.) Kaltenbrunner

 

4.Dezember 1968 | Santiago Bernabeu | 80.000 Zuschauer
Real Madrid: Betancort; Calpe, de Felipe, Zunzunegui, Sanchis; Pirri, Velazquez; Jose Luis, Amancio, Grosso, Gento (Bueno)
SK RAPID: Fuchsbichler; Gebhardt, Glechner, Fak; Bjerregaard, Ullmann; Fritsch, Kaltenbrunner, Grausam, Flögel, Söndergaard
Tore: 1:0 (41.) Velazquez, 1:1 (50.) Bjerregaard, 2:1 (82.) Pirri

 


Med an Kantasieg dsan 26. Ditl

In da Saison 1981/82 hod da SK Rapid im ledsdn Match an Sieg iwa Wacker Innsbruck braucht, dass in 26. Masdaditl daglengan. Des Gschbü is ans fo di dengwiadigstn in di ledsdn Joa gwesn. Dswa Dialn fom Kegerl – und des Match hod an gweisdn Weg ghobt. A Goi fom Hofmann Helmut und a Dswaradragl fom Panenka Antonin - des legendäre fimf-nui woa beafekt. Des ledsde Goi fom Panenka woa a Schupfa iwan Goalie driwa. Des Dial schded in da Hisdoarie fo da Rapid imma gaunds obmad.

 
25.Mai 1982 | Gerhard-Hanappi-Stadion | 25.000 Zuschauer
SK RAPID: Feurer; Weber; Krauss, Garger, Pregesbauer; Kienast, Hickersberger (61. Sintschenko), Willfurth (67. Gröss), Panenka; Keglevits, Hofmann
Wacker Innsbruck: Djulic; Hattenberger; Auer (67. Seebacher), Schenk, Zanon; Kircher (46. Schwarz), Weigl, Koreimann, Gretschnig; Braschler, E. Gröss
Tore: 1:0 (2.) Keglevits, 2:0 (16.) Keglevits, 3:0 (54.) Hofmann, 4:0 (82.) Panenka, 5:0 (88.) Panenka

 


Da legendäre Sieg iwa Dynamo Dresden

Am 6. März 1985 hod di Rapid im Fiatlfinale fom Europacup da Cupsieger an Schraufm griagd: Dynamo hod dsaus in Dresden med drei-nui gwunna, is oiso med an dickn Boesda nach Wean gfoan. Ka Mensch hod mea gmand, dass die Grien-Weissn weidakumman. Es san nua gaunds weniche Leid noch Hittlduaf kumma, owa da Pacult Peter hod glei noch fia Minutn a Goi gschossn. A Fiadlschdund drauf hod da Lainer Leo des dswa-nui gmochd. Jetsa san auf Jo und Na an oaschfoe Leid ins Schdadion bofld und hom an Grawäu gmocht wia ned gscheid. Da Pacult hod no fuan Bausnbfiff a dsweits Moi eignetsd. Daun hod da Panenka Tondo an Öfa eibaud und auf fia-nui gschdöd. In da Rapid-Fiadlschdund hod da Krankl Hanse mid ana wöd Andslaktsion ollas kloagmocht. Schdö da des fua: Rapid hod des nui-drei ausn Hischbü drad und olle dswa Schbüle dsomgrechnd med fimf-drei gwunna!

 
20.März 1985 | Gerhard-Hanappi-Stadion | 15.000 Zuschauer
SK RAPID: Feurer; Weber; Lainer, Garger, Brauneder; Panenka, Brucic, Willfurth; Pacult, Krankl, Kranjcar
Dynamo Dresden: Jakubowski; Dörner; Schuster, Trautmann, Döschner; Häfner, Pilz (83. Losert), Stübner; Gütschow (53. Lippmann), Kirsten, Minge
Tore: 1:0 (4.) Pacult, 2:0 (17.) Lainer, 3:0 (37.) Pacult, 4:0 (69., Elfmeter) Panenka, 5:0 (78.) Krankl

 


Iwa Dynamo Moskau ins Europacupfinale

Olle hom gmand, jetsn is ollas baletti. Duach des fimf-nui geng di Dynamo Dresden is di grien-weisse Maunschoft fo 1984/85 auf ana Eafoegswön gschwumma. Owa im Hoibfinal-Hischbü hod uns di Dynamo Moskau schnö ausm Dram ghoeffm. In da easchdn Höftn hom di Russn in Boin wia r am Schniarl renna lossn und hom duach an Öfa fom Karatejev ans-nui gfiad. Owa deamoen hom di Unsrichn ka Rapid-Fiadlschdund brauchd, se hom des Schbü scho fria drad. Dswischn da 67. und da 72. Minutn hom da Lainer, da Krankl und da Hrstic droffn - a schena drei-ans-Eafoeg. Im Rückschbü hod a ans-ans fian Aufschdig ins Finale fom Cupsieger-Europacup glaungd. Da Panenka Anton hod scho noch fia Minutn eignetsd. Öf Joa drauf woans wida im Finale, owa wida homs ned des Hefal gschdemd.

 
10.April 1985 | Gerhard-Hanappi-Stadion | 20.000 Zuschauer
SK RAPID: Konsel; Pregesbauer (46. Hrstic); Lainer, Garger, Brauneder; Willfurth, Panenka (85. Stadler), Weinhofer; Kranjcar, Krankl, Pacult
Dynamo Moskau: Prudnikov; Bulanov; Silkin, Bosniakov, Novikov; Chapsalis (79. Borodjuk), Wassiliev, Ataulin, Karatejev; Stukassov, Gassajev
Tore: 0:1 (26., Elfmeter) Karatejev, 1:1 (67.) Lainer, 2:1 (70., Elfmeter) Krankl, 3:1 (72.) Hrstic

 


Inter Mailand faliad im Hanappi-Schdadion

In da Saison 1990/91 hod di Inter Mailand im UEFA-Cup dseaschd Aston Villa, Partizan Belgrad, Atalanta Bergamo und Sporting Lissabon ausseghaud und daun im Finale geng di AS Roma gwunna. Deamoe warad in da easchdn Runde fia di Italiena in Hittlduaf beino Mateei am Letsdn gwesn. Di Italiena hom wöd Gika aufs Föd gschickt: in Zenga, in Bergomi, in Berti und di neichn deitschn Wödmasda, in Brehme, in Klinsmann und in Matthäus. Da Matthäus hod scho noch fimf Minutn auf ans-nui fia di Nerazzurri gschdöd und olle hom gmand, di wean uns di Buttn aunfün. Owa di Rapid hod si darapplt und si hom di Bati in da dsweitn Höftn duach dswa Goi drad: ans fom Pfeifenberger und ans fom Kegerl.

Im Rückschbü im Bentegodi-Schdadion hod di Rapid easchd in da Falengarung di Segln gschdrichn. Am End homs ds neint gschbüd, wäu da Pecl und da Pfeifenberger fom Blots gflogn san. Di Rapid hod da Inter in dswa Matches drei Dialn gmocht – genau so füle hod Inter in di neksdn nein Matches kassiad, befua s in Ditl eagattad hom.

 
19.September 1990 | Gerhard-Hanappi-Stadion | 15.000 Zuschauer
SK RAPID: Konsel; Kienast; Pecl, Poiger; Hauptmann (52. F. Weber), Schöttel, Herzog, Reisinger; Pfeifenberger (88. Wurz), Fjörtoft, Keglevits
Inter Mailand: Zenga; Bergomi; Battistini, Ferri; Brehme, Mandorlini, Matthäus (24. Pizzi), Berti, Bianchi; Klinsmann, Serena (6. G. Baresi)
Tore: 0:1 (5.) Matthäus, 1:1 (55.) Pfeifenberger, 2:1 (71.) Keglevits

 


Dresden lossd griassn: Fia-nui geng Sporting Lissabon

Des is da r a Drama gwesn, olle Leid san in d He ghupft. Nochn nui-dswa in Lissabon hom olle gmand, di Sporting med an Schiwe Kapatsunda wiad med uns Bauanoasch schbün: da ausbrodene Sa Pinto, da eisane Naybet und da Dominguez - a Dribblanski a gaunds a gfeantsda. Owa da Kühbauer hod des ans-nui gmochd und di Rapid woa wida in da Bati. Am End hod da bulgarische Legionär Iwanow Trifon wida amoi des Gfü ghobd, ea muas wia r a Dsenta schbün. Ea hod in da ledsdn Segundn in Stumpf Christian di Kugl ummigschobm - und dea hod des dswa-nui gmocht. Di Falengarung hod da Rapid ghead, si hom das Schbü dominiad und da Dani fon da Sporting is wegn Boiwekaschiassn fom Blots gflogn. Da Stumpf hod dsum drei-nui eikepflt. A Wäu drauf hod da Jancker Carsten, dea wos wengan Cut an Duaban drogn hod, in Aufschdig ins Fiatlfinale figsiad - med da augidschdn Bian hoda kepflt, des muasd da gebm!

 
2.November 1995 | Ernst-Happel-Stadion | 25.000 Zuschauer
SK RAPID: Konsel; Ivanov; Schöttel, Pivarnik, Heraf (59. Barisic), Jovanovic (65. Haller), Kühbauer, Stöger, Guggi; Stumpf, Jancker
Sporting Lissabon: Costinha; Nelson; Naybet, Marco Aurelio, Vujacic, Dominguez (76. Barbosa), Oceano, Sa Pinto, Pedro Martins, Amunike (66. Dani); Alvez (86. Xavier)
Tore: 1:0 (25.) Kühbauer, 2:0 (90.) Stumpf, 3:0 (105.) Stumpf, 4:0 (110.) Jancker

 


Feyenoord schwindlich gschbüd: Des dsweite Europacup-Finale woa gritsd

Des Fiatlfinalduö med da Dynamo Moskau wiad kana so schnö fagessn hom. Di Rapid hod draussd med ans-nui und dsaus med drei-nui gwunna. Oisdan, se woan im Hoibfinale! Duatn hod med Feyenoord Rotterdam a iwamechdiga Gegna gwoat. Im Hischbü hod Feyenoord ans-nui gfiad, owa da Jancker hod ausglichn - no amoi med da Bian. Im Rückschbü in Wean woa noch ana hoibm Schdund ollas kloa: Dswa Goi fom Jancker und ans fom Stumpf - da SK Rapid woa dsan dwseitn Moi im Endschbü fom Europacup.

 
18.April 1996 | Ernst-Happel-Stadion | 48.000 Zuschauer
SK RAPID: Konsel; Ivanov; Hatz, Schöttel, Guggi; Heraf, Kühbauer (86. Haller), Stöger (86. Mandreko), Marasek; Stumpf, Jancker
Feyenoord: De Goey; Koeman; Schuiteman, Boateng; Bosz, van Gastel, van Bronckhorst, Iwan (46. Obiku); Taument, Larsson, Vos
Tore: 1:0 (2.) Jancker, 2:0 (32.) Stumpf, 3:0 (35.) Jancker

 


Heksnkessl in Hittlduaf: Fümf-ans geng di Partizan Belgrad

Di Saison 2001/2002 woa fia di Rapid ka Honichschleckn ned. Midn Lothar Matthäus ois frischgflakdn Drena sans in da Masdaschoft nua auf Blots sibm glegn. Ka Mensch hod gmand, dass di Rapid im UEFA-Cup geng Partizan Belgrad a Dschants hod. Owa daun homs im Hischbü ausweats nui-ans faluan und se hom si wida an Aunrand gnumma. Des Rückschbü im Heksnkessl St. Hanappi woa ans fo di hassastn Matches iwahaupt. Di Rapid-Öf di bedropatsde hod si darapplt und med fimf-nui gwunna. Da Wagner René und da Wallner Roman hom dswa Dialn gschossn und da Taument Gaston hod si aa eidrogn. Ea und da Jazic Ante hom domoes a wöd Bati gschbüd.

 
27.September 2001 | Gerhard-Hanappi-Stadion | 15.400 Zuschauer
SK RAPID: Maier; Ratajczyk; Zingler, Freund; Markus Hiden, Taument, Prisc (63. Schießwald), Lagonikakis, Jazic; Wallner (91. Schöttel), Rene Wagner (77. Maletic)
Partizan Belgrad: R. Ilic; Bajic; Stankovic (87. Cirkovic), Ognjanovic; Trobok, S. Ilic, Duljaj, Cakar, Jeremic (63. Miskovic); Becanovic (54. Iliev), Delibasic
Tore: 1:0 (11.) Wallner 2:0 (34.) Taument 2:1 (58.) Cakar (Freistoß) 3:1 (60.) Wallner 4:1 (66.) R. Wagner 5:1 (72.) R. Wagner

 


Des Wunda fo Kazan

August 2004. Da SK Rapid hod in da Kwalifikatsion fian Europacup a schwas Los dsogn: Rubin Kazan. Des Hamschbü geng di fösnfesde Maunschoft aus Tatarstan homs med nui-dswa faluan und unsa Scheef fon da Obwea, da Hiden Martin, is mid göb-rod aussegschöd wuan, ea woa fias Rückschbü gschbead. Owa im Dsendralschdadion fo Kazan is des bassiad, wos si ka Mensch drama hod lossn. Di Rapid is dsruckkumma und hod noch ana hoibm Schdund duach a Dial fom Steff und ans fom Kincl Marek dswa-nui gfiad. Daun sans a Wäu im Reindl gwesen. Owa grod wias gaunds haglich wuan is, hod unsa Keptn, da Steff, dsuagschlogn. Ea hod in da 70. Minutn an Freischdos dsan drei-nui eibaud. Des woa da Aufschdig fia Rapid. Es is a brada Wech gwesn noch Tatarstan, ned füle Fans hom se des aundan. Owa olle, di midkumma san, hom des Gfü ghobt, des woa a leiwaunde Bescherung fia r a launge Foat.

 
26.August 2004 | Zentral-Stadion Kazan | 15.000 Zuschauer
Rubin Kazan: Kosko; Scotti, Sinew, Petrous; Bojarinzew, Sibaya, Scharonow, Konowalow, Sillah (55. Roussell); Calisto, Dominguez
SK RAPID: Macho; Korsos, Feldhofer, Adamski, Katzer; Hofmann, Hlinka, Ivanschitz (91. Kulovits), Dosek (86. Burgstaller); Kincl, Lawaree (59. Martinez)
Tore: 0:1 (18.) Hofmann, 0:2 (30.) Kincl, 0:3 (70., Freistoß) Hofmann

 


Da Powidl-Pepi dawischt di Lokomotiv Moskau am foischn Fuas

"Wos fi r a wöd Maunschoft!", hom di Leid in da Arena gsogt. Di Lokomotiv Moskau woa guad eigschdöd und a jeda Gika hod si an Haksn ausgrissn. A boa Rastellis hom s aa ghobt. Owa a Öfa fom Valachovic Pepi hod di Rapid im Schbü ghoidn - des Hischbü in Hittlduaf geng di faforisiadn Russn is ans-ans ausgaunga. Des Rückschbü in Moskau woa a Wäu offn, befua da Powidl-Pepi, so homs den Valachovic Jozef ghassn, dsuagschlogn hod. Seks Minutn fuan Schlussbfiff hod unsa Slowak di Moskowiter med an Kopfboi-Goi mittn ins Heats droffn. Da SK Rapid hod si dsan dsweitn Moi noch 1996 fia di Gruppenphase fo da UEFA Champions League gwalifidsiat ghobt.

 
23.August 2005 | Lokomotiv-Stadion | 26.000 Zuschauer
Lokomotiv Moskau: Owtschinnikow; Jewsejew, Paschinin, Asatiani, Sennikow; Gurenko, Maminow, Chochlow, Biljaletdinow; Samedow (58. Ismailow), Lebedenko
SK RAPID: Payer; Dober, Valachovic, Bejbl, Adamski; Hofmann, Korsos (75. Martinez), Hlinka, Ivanschitz; Akagündüz (54. Lawaree), Kincl
Tor: 0:1 (84.) Valachovic

 


A Ostasundog fia di Ewichkeid: Siebm-nui bei Red Bull Salzburg

Salzburg hod di Dabön nua med dswa Bunktn Fuoschbrung auf di Rapid aungfiad - so is da SK Rapid am Ostasundog in di Red Bull Arena eidsogn. Salzburg woa da Fawoarit, in 18 Bflichtschbü hintaranond sans ungschlogn gwesn. Wia di Rapid noch 17 Minutn fia-nui gfiad hod, is den Fans fo da Red Bull di Lod owigfoin. Glei noch da Bausn hod da Hoffer Erwin med sein drittn Dial des seks-nui gschossn. Jeds is a Schmundsla iwas Gsichd fom Rapid-Drena Pacult Peter ghuschd, dea wos di gaunde Dseid schdoisch und schdad am Bangl gsessn is. In Schlussbunkt hod da iwarogende Keptn Hofmann in da Nochschbüdseid gsedsd. Es woan no fimf Schbüle in da Masdaschoft iwrich, owa jeda hod gwusst, dass des sibm-nui s Masdaschdickl woa. Des Team is auf ana Wön folla Eufori gschwumma - und hod di ledsdn fimf Schbüle fon dera Saison gwunna.

 
23.März 2008 | Red-Bull-Arena | 20.600 Zuschauer
RB Salzburg: Ochs; Steinhöfer (25. Ngwat-Mahop), Vargas (55. Bodnar), Sekagya, Dudic; Ilic, Carboni, Leitgeb, Jezek; Janko, Zickler (46. Rakic)
SK RAPID: Payer; Dober, Eder, Patocka, Thonhofer; Hofmann, Heikkinen (76. Harding), Kulovits, Korkmaz (89. Kavlak); Hoffer, Maierhofer (72. Fabiano)
Tore: 0:1 (7.) Hoffer, 0:2 (10.) Maierhofer, 0:3 (11.) Korkmaz, 0:4 (17.) Maierhofer, 0:5 (30.) Hoffer, 0:6 (46.) Hoffer, 0:7 (91.) Hofmann

 


Your Nightmare Returns: Aston Villa wiad dswa Moi aussigjaukt

"Rapid by name, Rapid by nature" - des hod a englische Dseidung gschribm wia da Jelavic Nikica im Hischbü fon den Europa-League-Playoffs 2009/2010 geng Aston Villa scho noch 16 Sekundn midn Happi a Goi gmocht hod. Dsu dea Dseid hod no kana gwusst, dass di Rapid aa in da neksdn Saison densöwn Farein aus Birmingham dsuaglosd griagd. Dengwiadich woan schbedsiö di Schbüle draussd: Wia s dsan easchdn Moi dsomgrochd san, hod da Jelavic am Aunfaung fon da Rapid-Fiadlschdund mid sein Goi dsan dwa-ans in Aufschdig in di Gruppenphase figsiad. Im neksdn Joa hod di Rapid no wos auffiglegt, se hom in Wean ans-ans und im Villa Park drei-dswa gschbüd. Da Nutschi, da Gartler und da Sonnleitner hom di Goi gschossn. Da Sonnleitner hod no untan englischn Nochthimmö gmand, des wos di Fans fon da Rapid ooglifad hom, woa europäische Wödklasse.

 
20.August 2009 | Gerhard-Hanappi-Stadion | 17.800 Zuschauer
SK RAPID: Payer; Dober, Jovanovic, Patocka, Katzer; Hofmann, Heikkinen, Pehlivan, Drazan (83. Boskovic); Konrad (62. Trimmel), Jelavic
Aston Villa: Guzan; Beye, Cuellar, Davies (81. Lowry), Shorey; Sidwell; Milner, Reo-Coker, Gardner (55. Agbonlahor), A. Young; Heskey
Tor: 1:0 (1.) Jelavic

 

27.August 2009 | Villa Park | 23.563 Zuschauer
Aston Villa: Guzan; Beye, Cuellar, Davies (83. Lowry), Shorey; Milner, Delph (86. Albrighton), Petrow, A. Young; Heskey (82. Agbonlahor), Carew
SK RAPID: Payer; Dober, Soma, Patocka, Katzer; Trimmel (56. Maierhofer), Heikkinen, Hofmann, Pehlivan, Drazan; Jelavic (87. Boskovic)
Tore: 1:0 (38., Elfmeter) Milner, 2:0 (53.) Carew, 2:1 (76.) Jelavic

 

26.August 2010 | Villa Park | 30.000 Zuschauer
Aston Villa: Guzan; Cuellar, Collins, Davies, Beye; Reo-Coker (82. Delfouneso), Petrow, A. Young, Ireland; Heskey, Agbonlahor (40. Albrighton)
SK RAPID: Hedl; Dober, Sonnleitner, Soma, Katzer; Heikkinen, Pehlivan (78. Gartler); Kavlak, Hofmann (92. Patocka), Saurer (73. Trimmel); Nuhiu
Tore: 1:0 Agbonlahor (22.), 1:1 Nuhiu (52.), 2:1 Heskey (76.), 2:2 Sonnleitner (78.), 2:3 Gartler (81.)

 


Da Rapid-Geist gwinnd in Amsterdam

Med Ajax Amsterdam hod di Rapid in der Champions-League-Kwalifikatsion 2015/16 an iwamechtign Gegna dsogn. Di Grien-weissn hom di easchde Höftn fom Hischbü fabüsld und di Ajax hod si duach a hechare Boisichaheid an dswa-nui-Fuaschbrung aussegschbüd. Owa di Rapid hod se dafaungd und no a dswa-dswa ghoid. In da Amsterdam-Arena woa di Rapid di reifare Maunschoft, und mea aundsad homs aa. Duach a Goi fom Beric Robert und a Goi fom Schaub Louis sans med dswa-nui wekadsogn. Owa di Ajax hod si no amoi dsruckkempfd und in da dsweitn Höftn ausglichn. Ois di Niederländer no hurra gschrian hom und di Bati um a Hoa drad hedn, hod da Louis sei Heats in d Hand gnumma und mid an wöd Goi dafia gsuagd, dass di Rapid wida gfiad hod. A Waunsinns-Bahö im Ausweatsblock - und di Amsterdamer Fans san da wos schdad gwesn! Di Rapid hod in niederländischn Rekoadmasda aus da Kwalifikatsion aussighaud. In da nekstn Nocht hom hundade Fans unsare Gika bei da Aunkunft am Flughofn Wien-Schwechat gfeiad.

 
4.August 2015 | Amsterdam-ArenA | 51.258 Zuschauer
Ajax: Cillessen; Tete, Veltman (71. Sanogo), Riedewald, Dijks; Bazoer, Klaassen, Fischer (59. Gudelj); El Ghazi, Milik, Sinkgraven (87. Schöne)
SK RAPID: Novota; Auer, Sonnleitner, Dibon, Stangl; Petsos, Grahovac; Schaub (88. Alar), S. Hofmann (59. Schobesberger), F. Kainz; Beric (94. Prosenik)
Tore: 0:1 (12.) Beric, 0:2 (39.) Schaub, 1:2 (52.) , 2:2 (75.) Gudelj (75.), 2:3 (77.) Schaub

 


Di gresdn und di bitastn Match

Ds guada Ledsd di dswa gresdn und bitastn Matches. Im Joa 1985 hod di Rapid im Finale fom Cupsieger-Europacup geng FC Everton gla beigebm miassn. Owa ollawäu, si hom dseaschd Besiktas, Celtic, Dynamo Dresden und Dynamo Moskau aussigschdampat ghobd. Da Krankl Hanse hod des bis heitigndogs andsige Goi fon ana ösdareichischn Maunschoft in an Europacupfinale gschossn.

Im Joa 1996 hod si di Gschichd widahoid: Noch Eafoign geng Petrolul Ploiesti, Sporting Lissabon, Dynamo Moskau und Feyenoord woa des ledsde Hindanis aufm Weg dsum Europacupsieg Paris St. Germain. A oogföschda Freischdos fom N’Gotty Bruno hod in grien-weissn Dram blotsn lossn - schen bled. Owa bis dsan heitign Dog is di Rapid di andsige ösdareichische Maunschoft, di wos dswa Moi in an Endschbü fon an Europacup gwesn is.

 
15.Mai 1985 | Feyenoord-Stadion | 45.000 Zuschauer
FC Everton: Southall; Stevens, Mountfield, Ratcliffe, van den Hauwe; Steven, Reid, Bracewell, Sheedy; Sharp, Gray
SK RAPID: Konsel; Weber; Lainer, Garger, Kienast, Brauneder; Hrstic, Kranjcar, Weinhofer (68. Panenka); Pacult (60. Gröss), Krankl
Tore: 1:0 (58.) Gray, 2:0 (72.) Steven, 2:1 (85.) Krankl, 3:1 (88.) Sheedy

 

8.Mai 1996 | Stade Roi Boudouin | 36.000 Zuschauer
Paris St.Germain: Lama; N´Gotty, Le Guen, Roche; Fournier (78. Lacer), Guerin, Djorkaeff, Bravo, Coletter; Rai (62. Dely Valdes), Loko
SK RAPID: Konsel; Ivanov; Schöttel, Hatz, Guggi; Heraf, Kühbauer, Stöger, Marasek; Stumpf (46. Barisic), Jancker
Tor: 1:0 (29., Freistoß) N´Gotty

 


Mehr als 3000 Wörter und Wendungen des Wienerischen finden Sie in diesem Buch!

Mit Textbeispielen aus Wienerliedern, Austropop-Schlagern, beliebten Kabarettprogrammen und vielem mehr. Als Draufgabe gibt es Informationen über die Wortherkunft nach neuestem Stand der Wissenschaft. Ein unentbehrliches Nachschlagewerk, das Wissen vermittelt und zugleich köstlich amüsiert.

Robert Sedlaczek
Wörterbuch des Wienerischen
In Zusammenarbeit mit Melita Sedlaczek
318 Seiten, € 12,95
ISBN 978-3-85218-891-1
Haymon Verlag

Link zum Buch

Pfitschigogerl

Extrawürstel

Unsare Wuadsln

Di Goidanen Joa

Di Bfoawisn

Gerhard-Hanappi-Schdadion

Di 80er und di 90er Joa

Legendenklub

Di Rapid-Fiadlschdund