Grien-Weiss in Europa – a Foat mid dswöf Schdatsionan
Dsan easchdn Moi seid dswandsg Joa is di Rapid in an intanadsionaln Beweab iwa d Wintabause driwakumma. In da Saison 1995/96 host dafia 4 Matches braucht, jets woans dsene. Di Buam fom Zoran „Zoki“ Barisic hom si in di Fuaßboi-Gschichtsbiachln einegschbüd: Di Rapid is ned nua iwan Winta driwakumma, na, si san sogoa Gruppmsiega wuan. Und unsa Keptn, da Hofmann Steffen, woa auf da offidsiön Homepage fom Europäischen Fußballverband im „Team der Gruppenphase“!
Owa im neichn Joa woa di Europa League fia di Rapid wia r a besa Draam. Oisdan, red ma liawa dseascht iwa di scheenan Sochn.
Amsterdam – kana hod mid sowas grechnt
Aungfaungt hods in da drittn Kwalifikationsrunde dsua UEFA Champions League. Da SK Rapid hod di Amsterdamer Ajax-Gicka dsuaglost griagt. Di Ajax is a Farein mid ana gloareichn Hisdoarie, in di 70er Joa woa di Ajax Wöd-Schbidse. Im Joa 1995 homs – agurad im Broda-Schdadion – des Endschbü fon da Champions League gwunna – und dsan ledsdn Moi a so a Hefal gschdemmt.
Heit san di Niedalända in Europa nimma gauns fuan. Owa gengan SK Rapid sans ollawäu no faforisiat wuan. Im Hinschbü hom 43.000 Fans in Wean des Gfüh ghobd: Jets is oha. 43 Minutn woan gschbüd und di Ajax hod duach an Dopplpack fom Klaasen mid dswa-nui gfiad ghobd. Und i sogs eich: Es woa r a Masn, dass di Niedalända ned hecha gfiad hom!
Owa in da dsweitn Höftn woa r a gaunds aundare Rapid dsum Segn. Da Kainz Florian hod auf ans-dswa fakiadst, und di Grien-Weissn hom si ned amoi duach an Ausschluss irridian lossn: Da Schwab Stefan hod wegn an waunsinnign Tackling in Jolly griagt und si schdantepede brausn diafn. Owa drots dass nua mea dsen Rapidla am Blots woan, is da Ausgleich in da Luft glegn. Di Rapid-Fiadlschdund is eiklatscht wuan, und unsa Goigetta, da Beric Robert, hod sei Dial gmocht, wia se si fia r an Goigetta ghead.
Olle hom gsogt, es is no niks faluan, di Dschants is no lewentich. Di Rapid hod scho efdas a K.O.-Duell ausweats hibogn: Kazan 2004, Moskau 2005, da Dopplpack beim Aston Villa FC in Birmingham.
Gschätsde 2.500 Rapid-Fans san in di friare europäische Fuaßboi-Hauptsschdodt dsogn und hom a leiwaunde easchde Hoibdseid fo di Grien-Weissn gsegn. Da Beric Robert hod noch dswöf Minutn des Goi dsum ans-nui gschossn, und da Schaub Louis hod in da 39. Minutn auf dswa-nui gschdöd.
Owa glei nochn Seitnweksl hom di Niedalända auf ans-dswa fakiatst und in da 75. Minutn ausglichn – homma des ned scho amoi gsegn? Owa di Rapid is ned aso wia di Ajax. Glei drauf a grandioses Dial fom Schaub, unsan „Euro-Louis“, jetsan woa da Deckl drauf – da Draam fo Amsterdam is woah wuan. Und am Flughofn Wien-Schwechat hom um fire in da Frua iwa 1.000 Fans di Hödn fo Amsterdam empfaungan – ois wauns in berimbtn Henkelpott noch Hittlduaf ghoid hettn!
Dramatisches Out gegn Shakhtar
Oisdan, mia woan im Playoff fo da Champions League. Shakhtar Donezk hod auf uns ois Gegna gwoat, a Schdommgost in da Königsklasse. Im ned gauns ausfakauftn Happel-Schdadion woan di Ukrainer di Faforitn – si ham wia imma mid an Schiwe Brasiliana gschbüd. Duach a Goi fom Marlos kuats fua da Hoibdseid hom di Ukrainer des Match mid ans-nui gwunna. Da Goalie Pjatow hod a Gronodn fom Kainz Florian mid ana aussaiadischn Parade endscheaft.
Jetsa homma des „Wunda fo Lemberg“ braucht – di Ostukrainer hom in Lwiw (Lemberg) schbün miassn, mea ois 1.000 Kilometa weid weg fom Heimschdadion. Wegn da Reiwarein in da Donbass-Provinz hams dsaus ned schbün diafn. Auf des hinuaf hom di Rapidla a kiatsare Aunreise ghobt ois wia di Ukrainer.
Noch dsen Minutn hom olle gmaand, da grien-weisse Draam is blotst: Da Marlos hod dsum ans-nui fia di Ukrainer eignedst – unhoitboa fia unsan Novota. Owa a boa Minutn drauf hod di Barisic-Öf di Bati draht. Dseaschd amoi hod da Schaub Louis, unsa Europacup-Jass, droffn. Und in da 22. Minutn hod unsa Käptn, da Hofmann Steffen, an Freischdos unhoitboa eibaut.
Daun 27 Minutn schbeda da neksde Schreckn: Gladkij hod ausglichn. In da dsweitn Hoibdseid woa des Gschbü a echta Thriller, a Drama in Grien-Weiss. Owa leida ned mid an Happy-End. A Kepfla fom frei doschdehendn Beric Robert in da ledsdn Minutn hod um a boa Dsentimeta di Kistn faföhd. In da 95. Minutn is a Nochschuss fom Prosenik Philipp aun di Schdaungan dschundat. Des haast: ka Champions-League. Owa da Präsident, da Krammer Michael, hod a neiche Losung ausgebm: „Jetzt rocken wir die Europa League!“
Des göwe U-Boot wiad fasenkt
Da Präsi hod recht ghobt. Scho am easchdn Schbüdog hod di Rapid dsum Einschdaund an iwaroschendn Sieg gengan spanischn Schbidsnklub Villarreal gfeiat. Scho wieda hod di Öf fom Barisic Zoran an nui-ans-Rückschdaund egalisiad. Deamolen hod a Goi fom Schwab Stefan und a eiskoid fawondlta Öfa fom Hofmann Steffen dsum dswa-ans greichd – mea ois 36.000 Leid hom dsuagschaut.
A gauns gwehnlicha Dunnasdog in Weissrussland
Am dsweiten Schbüdog hods a Ausweatsreise noch Belarus gebm. Da Gegna woa Dinamo Minsk. Gschbüd homs ned in da Hauptschdodt, sundarn in da Borisow-Arena fo BATE. Wisstsas e: In da Champions League Qualifikation hod Dinamo Minsk in ösdarreichischn Masda und Cupsiega eliminiad ghobt. Owa geng di Rapid hods fia di Blau-Weissn niks dsan Feian gebm. Da Hofmann Steffen hod med an sottn Schuss in da 54. Minutn ollas kloa gmocht und in easchd dsweitn Ausweatssieg fom SC Rapid in aner Gruppmphasn fiksiat. Unsa Sportdirektor Andreas Müller hod si gfreid wia r a Schneekenig und mid an Schmundsla hod a gsogt: „Ein ganz normaler Donnerstag.“
Doppelpack mid Sekser geng di Viktoria Pilsen
Daun dswa Moi hintaranond gegn di Viktoria Plzen – aus da behmischn Biametropole Pilsen (Plzen). Di Dschechn san in di ledsdn fia Saisonen glei drei Moi auf da europäischn Ewane iwan Winta driwakumma und woan a wengal faforisiat. In Wean san di Gika aus da Bia-Schdodt scho in da 12. Minutn in Führung gaunga und di 3.000 midgraasdn Dschechn hom scho gfeiad – owa dsfrua. Da Hofmann Steffen hod no fua da Hoibdseid droffn, und da Schaub Louis und da Petsos Thanos nochn Seitnweksl. Di drei Punkte san in Wean bliebm, do hod a da Aunschluss-Dreffa fom Hrosovsky in da 76. Minutn niks mea endan kenna. Im Rückschbül hod daun da Rapid-Gicka mid da Numma 7 Gschichte gschriebm. Ned nua duach sein Dopplpack, dea den dswa-ans-Ausweatssieg gsichad hod, na, duach di Oat wia r a des goidane Goi gmocht hod. Wisstas e, seid dem Dog is da Philipp Schobesberger da Schdoipasbeaga.
Des andsiche falurane Schbü in da Gruppmphasn
Da fümfte Schbüdog hod di Rapid und eanare Fans noch Spanien gfiat. Di Grien-Weissn hom gegn Villarreal kempft wia ned gscheid, owa di Spania hom am End med ans-nui gwunna. Owa mea ois des falurane Schbü duan mia di schwaan Faledsungen weh – fom Goalie Novota und fom Fadeidiga Dibon. Beide hom si oparian lossn miassn.
Gruppmsiega duachn fümftn Sieg
Dsum ledsdn Hamschbü im Kalendajoa 2015 san no amoi di Fans ins Ernst-Happel-Schdadion boflt. Trods dass da Aufstieg in di K.O.-Phasn scho fiks woa, san 35.000 Fans dsum ledsdn Gruppmgschbü gegn Dinamo Minsk kumman, und hintnnoch woas kan lad. Da Hofmann Maxi und da Jelic Matej hom aungschriebm – fia di dswa woans di easchdn Europacup-Goi in ana Rapid-Bania. Und fia di Maunschoft woa s da fümfte Sieg im sekstn Gruppmschbü. Da Aunschluss-Dreffa fon de Gäst woa nua mea fia di Schdadistik. Und da SK Rapid woa mid an Dreia da Gruppmsiega, weu Villarreal in Pilsen nua remis gschbüd hod. A Europacup-Hoibsaison wia aus an Draam hod an End gfundn – an End, wia sis olle gwunschn hobm. Hoff ma, dass im Fruajoa meglichst laung aso weidaged – oda meglichst laung ned fü aundas!
A hisdoarischa Schraufm gegn di Fledameis
Guat, mia hom gwusst, di Villa Real woa dswa Moi im Finale fon da UEFA Champions League, owa kana hod mid dem grechnd, wos daun gschegn is: mia hom dswa Moi a Watschn graigt.
Ia wisstsas eh: Im Estadi de Mestalla is da Joahundat-Austrianer Herbert „Schneckal“ Prohaska ois Drena fon da östdarreichischn Nadsionalmaunschoft mid nui-nein hamgschickt wuan. Jetsd san 34 Minutn gschbüd gwesen und di Schbania hom mid fümf-nui gfiat – da ane oda da aundare hod gmaand, mia wean mid an dswaaschdöllign Schdiftn hamfoan. Di Villareal hod a boa Wochn fria gengan FC Barcelona mid nui-siem faluan, jetsa woans wieda obmauf und hom aufgeigt wia ned gscheid.
Daun hom si di Grien-Weissn darapplt. In da dsweitn Höftn homs a boa Dschantsn ghobt, owa es is ka Goi draus wuan. Gauns am End hom s no a seksts Dial griagt – es woa des schwaaste Dragal in da Europacup-Hisdoarie fon da Rapid. Nua da LASK, di Wiener Austria und da FC Tirol hom schwaarare Dragaln oghoslt: Da LASK hod 1977 mid nui-siebm gegn Ujpest Dosza faluan, di Wiener Austria 1972 aa mid nui-siebm gegn Beroe Stara Zagora, a Maunschoft aus Bulgarien, di ned dsu de gauns Großn gheat hod, und da FC Tirol midn „Wödmasta“ Ernst Happel ois Drena: ans-neine bei Real Madrid im Joa 1990.
Dsan Rückschbü san ned gauns 40.000 Leit ins Broda-Schdadion kumma. A boa hom gmaant, s „Wunder vom Wildpark“ kennt si wiedahoin – deamoin, im Joa 1993, is di Valencia fom Karlsruher SC mid siebm-nui wegbutsd wuan.
Fia r a Wäu woas a offane Batii, owa in da dsweitn Höftn hom di Schbania in a boa Minuten an Triplepack gschofft. A fiates Dial in da 88. Minutn – des Desasta woa komplett: nui-fiere, und die dswa Matches dsamdsöd nui-dsene.
Owa drots dass di Rapid gegn Valencia obissn hod – mia denkn gean auf di Europacup-Saison 2015/16 dsruck. Di Rapid-Maunschoft hod uns a Bodsn Freid gmocht. Und mia hoffm auf a Foat duach Europa mid mea ois dsen Schdatsionan im negstn Joa.